Kalurahan Semanu

Sinom:

1. Purwaning wiwit anyekar

roning kamal basaneki

srana angudhari gantha

ganthane budi adhikih

lan seserepan sepi

awit ginubel balilu

amung sinurung rasa

kumedah-kedah memetri

anembrama wulan Siyam kang minulya.

 

2. Tumrap warga Islam samya

angrantos kang wulan suci

setaun pan lawasira

kanthi manah golong-gilig

lair batin nyawiji

tan len mung srana manekung

dhedhepe ngarsanira

Gusti kang wus paring idi

mring uripe manungsa ing jagat raya.

 

3. Jroning siyam iku nyata

angeker nepsu sayekti

liring nepsu yen ginerba

warna-warna araneki

ora dhahar sawiji

tan ngunjuk ya jangkepipun

wiwit gagat rahina

tekeng wayah surup mesthi

iku laku nenuntun raga mrih pana.

 

4. Maknane pana punika

weruh bab ingkang sejati

yen luwe iku mupangat

kanggone badan puniki

nenuntun ninging pikir

laras surasaning kalbu

momong rasaning liyan

miskin mulya iku sami

gilir gumanti nut purbaning Kawasa

 

5. Kaping pindho pancadryiya

tutuk kuping mripat yekti

rineksa ywa gawe dosa

micara kang bener becik

sareh resep lan ririh

dene talingan puniku

pamirenge jinaga

saking ling kasar lan wengis

tukar padu memungsuhan ngundhamana.

 

6. Katri ponang paningal

pesunen ingkang patitis

aja mulat bab kang nistha

kaya badane pawestri

perangan inkang wewadi

yen dangu pamulatipun

kang bisa nggugah rasa

rasaning syahwat sayekti

temah rurah ganjaraning pasanira

 

7. Becike sabar darana

tumindak kanthi nastiti

manut tuntunaning sabda

kanjeng Nabi Rasul yekti

yen mungsuh kang utami

tumraping wong Islam iku

dudu wong kang birawa

sajroning prang gung puniki

yekti  amung hawa nepsu angganira

 

8. Lamun wus sawulan natas

mesu raga miwah batin

bakda Riyaddin wus nyata

dadi kamenangan Mukmin

ingaran Idul Fitri

wangsul ing kasucen tuhu

ngapura ingapuran

brayat agung lan sesami

mugi Allah paring idi mrih sampurna

 

Dening: Sakiyo, S.S (Pendamping Desa Budaya Semanu )